Tíðarfar í apríl 2019

Hlýjasti aprílmánuður frá upphafi mælinga á sex veðurstöðvum

3.5.2019

Óvenjulega hlýtt var á landinu öllu í apríl. Þetta var hlýjasti aprílmánuður frá upphafi mælinga í Reykjavík, Stykkishólmi, Bolungarvík, Grímsey, á Akureyri og á Hveravöllum. Suðaustlægar áttir voru ríkjandi. Þurrt og bjart var norðanlands en blautara syðra. Gróður tók vel við sér.

Hiti

Meðalhiti í Reykjavík mældist 6,5 stig, 3,6 stigum ofan meðallags áranna 1961 til 1990 en 2,8 stigum ofan meðallags síðustu tíu ára. Á Akureyri var meðalhitinn 6,9 stig, 5,3 stigum ofan meðallags áranna 1961 til 1990 en 4,2 stigum ofan meðallags síðustu tíu ára. Í Stykkishólmi var meðalhitinn 5,8 stig og 6,0 stig á Höfn í Hornafirði.
Mánuðurinn var hlýjasti aprílmánuður frá upphafi mælinga í Reykjavík, Stykkishólmi, Bolungarvík, Grímsey, á Akureyri og á Hveravöllum. Á landsvísu var mánuðurinn sá næsthlýjasti, hlýrra var í apríl 1974.
Meðalhita og vik á fleiri stöðvum má sjá í töflu.

stöð	meðalhiti °C	vik 1961-1990 °C	röð	af	vik 2009-2018 °C
Reykjavík	6,5	3,6	1	149	2,8
Stykkishólmur	5,8	4,2	1	174	2,9
Bolungarvík	5,1	4,3	1	122	3,3
Grímsey	4,6	4,7	1	146	3,3
Akureyri	6,9	5,3	1	139	4,2
Egilsstaðir	5,5	4,3	2	65	3,3
Dalatangi	4,3	2,8	4	81	1,8
Teigarhorn	4,8	2,6	6	147	1,7
Höfn í Hornaf.	6,0				2,1
Stórhöfði	5,6	2,2	5	142	1,7
Hveravellir	1,5	4,8	1	55	3,7
Árnes	6,1	4,0	2	140	3,1

Meðalhiti og vik (°C) í apríl 2019
Óvenjulega hlýtt var á landinu öllu í apríl, mánuðurinn var sá hlýjasti frá upphafi mælinga á allmörgum stöðvum og hitamet slegin víða. Vikin voru mest á Norðurlandi en minni við suður- og austurströndina. Jákvætt hitavik miðað við síðustu tíu ár var mest 4,5 stig við Mývatn en minnst 1,5 stig í Papey. 


Hitavik sjálfvirkra stöðva í apríl miðað við síðustu tíu ár (2009-2018).
Meðalhiti mánaðarins var hæstur 7,2 stig við Sandfell í Öræfum en lægstur -1,2 stig á Gagnheiði. Í byggð var meðalhitinn lægstur í Möðrudal, 2,6 stig.
Mest frost í mánuðinum mældist -18,2 stig á Setri þ. 1. Mest frost í byggð mældist -15,5 stig í Möðrudal þ. 3.
Hæsti hiti mánaðarins mældist 19,3 stig á Þingvöllum þ. 30. Fjöldi aprílhitameta féll á veðurstöðvum landsins, flest þ. 30. en að auki var sumardagurinn fyrsti sem var þ. 25., mjög hlýr. Nýtt aprílhitamet var m.a. sett í Reykjavík þann 30. þegar hitinn mældist 17,1 stig, sem er það hæsta síðan hitinn mældist 15,2 stig þ. 29.apríl 1942.

Úrkoma

Þurrt var norðanlands á meðan úrkomusamara var sunnantil á landinu.
Úrkoma í Reykjavík mældist 81,4 mm sem er 40 % umfram meðallag áranna 1961 til 1990. Á Akureyri mældist úrkoman aðeins 7,5 mm sem er um 25% af meðalúrkomu áranna 1961 til 1990. Ekki hefur rignt eins lítið á Akureyri í aprílmánuði síðan árið 2000. Úrkoma í Stykkishólmi mældist 45,7 mm og 161,2 mm á Höfn í Hornafirði.
Dagar þegar úrkoma mældist 1,0 mm eða meiri í Reykjavík voru 19, fimm fleiri en í meðalári. Á Akureyri mældist úrkoma 1,0 mm eða meiri 2 daga, 4 færri en í meðalári.

Snjór

Alhvítir dagar voru 3 í Reykjavík og er það jafnt meðallagi áranna 1971 til 2000. Aldrei varð alhvítt á Akureyri en þar eru að jafnaði 9 alhvítir dagar í apríl.

Sólskinsstundafjöldi

Sólskinsstundir í Reykjavík mældust 116,4, sem er 23,7 stundum færri en í meðalári. Á Akureyri mældust sólskinsstundirnar 168,5, sem er 38,8 stundum fleiri en í meðalári.

Vindur

Suðaustlægar áttir voru ríkjandi í mánuðinum. Vindur á landsvísu var 0,1 m/s yfir meðallagi. Suðaustanhvassviðri gekk yfir landið dagana 12. og 13. og aftur þ. 16.

Loftþrýstingur

Meðalloftþrýstingur í Reykjavík mældist 1011,0 hPa og er það 0,5 hPa yfir meðallagi áranna 1961 til 1990. Hæstur mældist loftþrýstingurinn 1034,6 hPa á Egilsstaðaflugvelli þ. 7. Lægsti loftþrýstingur mánaðarins mældist 983,2 hPa í Straumsvík þ. 23.

Fyrstu fjórir mánuðir ársins

Meðalhiti í Reykjavík fyrstu fjóra mánuði ársins var 2,3 stig sem er 1,5 stigum ofan meðallags áranna 1961 til 1990 en 0,3 stigum yfir meðallagi síðustu tíu ára. Meðalhitinn raðast í 14. sæti á lista 149 ára. Á Akureyri var meðalhiti mánaðanna fjögurra 1,2 stig. Það er 2,0 stigum ofan meðallags áranna 1961 til 1990, en 0,5 stigum ofan meðallags síðustu tíu ára. Meðalhitinn þar raðast í 17. til 18. sæti á lista 139 ára. Úrkoma hefur verið 20% umfram meðallag í Reykjavík, en 15% umfram meðallag á Akureyri.

Skjöl fyrir apríl

Meðalhiti á sjálfvirkum veðurstöðvum í apríl 2019 (textaskjal).
Daglegtyfirlit mánaðarins á þremur ákveðnum veðurstöðvum er hægtsækja í sérstaka töflu.

 https://www.vedur.is/um-vi/frettir/tidarfar-i-april-2019
 

Tíðarfar í febrúar 2019

Stutt yfirlit

1.3.2019

Mánuðurinn var mjög tvískiptur. Fyrri hluti mánaðarins var kaldur og þónokkur snjór var á landinu. Þurrt og bjart var suðvestanlands en úrkomusamara norðanlands. Mikil hlýindi einkenndu síðari hluta mánaðarins og snjóa leysti víðast hvar á láglendi.

Hiti

Meðalhiti í Reykjavík í febrúar var 1,0 stig og er það 0,7 stigum ofan meðallags áranna 1961 til 1990 en -0,3 stigum neðan meðallags síðustu tíu ára. Á Akureyri var meðalhitinn -1,1 stig, 0,4 stigum yfir meðallagi áranna 1961 til 1990 en -0,9 stigum undir meðallagi síðustu tíu ára. Í Stykkishólmi var meðalhitinn -0,1 stig og 1,5 stig á Höfn í Hornafirði.
Meðalhita og vik á fleiri stöðvum má sjá í töflu.

stöð	meðalhiti °C	vik 1961-1990 °C	röð	af	vik 2009-2018 °C
Reykjavík	1,0	0,7	46	149	-0,3
Stykkishólmur	-0,1	0,6	57	174	-0,8
Bolungarvík	-0,2	0,8	41	122	-0,5
Grímsey	0,2	1,2	36	146	-0,5
Akureyri	-1,1	0,4	61	139	-0,9
Egilsstaðir	-1,1	0,8	30	65	-0,9
Dalatangi	1,6	1,0	25 til 26	81	-0,5
Teigarhorn	1,5	1,3	36	147	-0,1
Höfn í Hornaf.	1,5				-0,4
Stórhöfði	2,8	0,8	33	143	0,1
Hveravellir	-4,9	1,1	20	55	-0,3
Árnes	0,0	1,0	30	140	-0,1

Meðalhiti og vik (°C) í febrúar 2019
Hiti í mánuðinum var tvískiptur. Í byrjun mánaðar var mjög kalt á meðan hlýindi einkenndu síðari hlutann. Að tiltölu var hlýjast við suðurströndina, jákvætt hitavik miðað við síðustu tíu ár var mest 0,7 stig í Skaftafelli. Að tiltölu var kaldast inn til landsins norðaustanlands, neikvætt hitavik var mest í Möðrudal, - 1,6 stig.


Hitavik sjálfvirkra stöðva í febrúar miðað við síðustu tíu ár (2009-2018).
Meðalhiti mánaðarins var hæstur 3,8 stig í Surtsey en lægstur -6,3 stig í Sandbúðum. Í byggð var meðalhitinn lægstur -4,8 stig í Svartárkoti.
Hæsti hiti mánaðarins mældist 15,2 stig á Skjaldþingsstöðum þ. 23. Mesta frost í mánuðinum mældist -29,3 stig í Svartárkoti þ. 3. 

Úrkoma

Úrkoma í Reykjavík mældist 72,9 sem er jafnt meðaltali áranna 1961 til 1990. Febrúar var úrkomusamur á Akureyri, úrkoman mældist 78,1 mm, sem er 84% umfram meðallag áranna 1961 til 1990. Í Stykkishólmi mældist úrkoman 49,0 mm.
Dagar þegar úrkoma mældist 1,0 mm eða meiri í Reykjavík voru 15, tveimur fleiri en í meðalári. Á Akureyri mældist úrkoma 1,0 mm eða meiri 13 daga mánaðarins, fimm fleiri en í meðalári.

Snjór

Alhvítir dagar í Reykjavík voru 17, fimm fleiri en að meðaltali 1971 til 2000. Alhvítt var 25 daga á Akureyri sem er 6 fleiri en í meðalári.

Sólskinsstundafjöldi

Sólskinsstundir í Reykjavík mældust 74,0 sem er 22,1 stundum fleiri en í meðallagi í janúar. Á Akureyri mældust sólskinsstundirnar 40,2, sem er 4 stundum fleiri en í meðalári.

Vindur

Meðalvindhraði á landsvísu var um 0,4 m/s yfir meðallagi áranna 1961 til 1990. Norðaustlægar áttir voru ríkjandi fyrstu tíu daga mánaðarins en eftir það urðu suðlægar áttir tíðari. Mikið hvassviðri gekk yfir landið dagana 25. og 26. febrúar.

Loftþrýstingur

Meðalloftþrýstingur í Reykjavík mældist 1000,1 hPa sem er 2,5 hPa undir meðallagi áranna 1961 til 1990. Hæsti þrýstingur í mánuðinum mældist 1022,8 hPa á Höfn í Hornafirði þ. 25. Lægsti loftþrýstingur mánaðarins mældist 972,6 hPa á Keflavíkurflugvelli þ. 12.

Fyrstu tveir mánuðir ársins

Meðalhiti í Reykjavík var 0,7 stig sem er 0,9 stigum ofan meðallags áranna 1961 til 1990 en 0,6 stigum undir meðallagi síðustu tíu ára. Meðalhitinn raðast í 33. til 34. sæti á lista 149 ára. Á Akureyri var meðalhiti mánaðanna tveggja -1,0 stig. Það er 0,9 stigum ofan meðallags áranna 1961 til 1990, en 0,9 stigi neðan meðallags síðustu tíu ára. Meðalhitinn þar raðast í 49. sæti á lista 139 ára. Úrkoma hefur verið um 20% umfram meðallag í Reykjavík, en 50% umfram meðallag á Akureyri.

Skjöl fyrir febrúar

Meðalhiti á sjálfvirkum veðurstöðvum í febrúar 2019 (textaskjal).
Daglegt yfirlit mánaðarins á þremur ákveðnumveðurstöðvum er hægt sækja í sérstaka töflu


 https://www.vedur.is/um-vi/frettir/tidarfar-i-februar-2019

Áhugaverðar mælingar frá nýrri veðurstöð

Í froststillunni í lok janúar og byrjun febrúar 2019 mældist mun meira frost á Veðurstöðinni Víðidal en annars staðar á höfuðborgarsvæðinu

11.2.2019

Í lok ársins 2018 bættist við ný veðurstöð á höfuðborgarsvæðinu , Víðidalur. Bæta á við fimm nýjum stöðvum á höfuðborgarsvæðinu fyrir lok ársins 2019 og er Víðidalur sú fyrsta í röðinni. Víðidalur var ekki lengi að koma sér á kortið, en í frostkaflanum 26. janúar til 4. febrúar s.l. mældist töluvert meira frost þar en annars staðar á höfuðborgarsvæðinu.

Veðurstöðin Víðidalur fyrir miðri mynd, í bakgrunni er  Fella- og Hólahverfi. Veðurstöðin er staðsett á Víðivöllum, félagssvæði Hestamannafélagsins Fáks, í Víðidal. Vel sést að byggðin stendur hærra í landi en veðurstöðin. (Ljósmynd: Jón Bjarni Friðriksson)

Mikill munur á lágmarkshita á milli veðurstöðva í mesta frostinu

Veðurstöðin í Víðidal er í 71 m hæð yfir sjávarmáli en dalurinn er mjög flatur og liggur lægra en byggðin í kring. Í næsta nágrenni, í 2,5 km fjarlægð, er veðurstöð Vegagerðarinnar við Arnarnesveg. Sú veðurstöð er í 116 m hæð yfir sjávarmáli, ofan á hljóðmön við austurenda golfvallar Garðabæjar. Í froststillum í lok janúar og byrjun febrúar mældist mikið frost á veðurstöðinni Víðidal. Frost mældist yfir 20 stig aðfararnótt 31. janúar sem og að morgni 2. febrúar, en þá mældist rétt fyrir hádegisbil -21.3°C.  Við Arnarnesveg var mesta frost -14.9°C sama morgun og í veðurreit Veðurstofunnar -12.1°C. Gaman er að bera saman lágmarkshita hverjar klukkustundar á þessum þremur veðurstöðvum á öllu tímabilinu 26. janúar til 4. febrúar. Mikill munur var á lágmarkshitanum í mesta frostinu og þá var mun kaldara í Víðidal en á hinum tveimur stöðvunum. Í vægara frosti var aftur á móti lítill sem enginn munur á milli stöðvanna.
Lágmarkshiti (°C) á veðurstöðvunum Reykjavík, Víðidal og Arnarnesvegi 26. janúar til 4. febrúar 2019. 

Fjölbreytileiki hitafars á höfuðborgarsvæðinu

Ástæða þessa liggur í mismun legu stöðvanna. Segja má að bæði veðurstöðin Arnarnesvegur og Reykjavík séu á hæðum. Víðidalur er hinsvegar á flatlendi, með hærra landslagi í kring. Í froststillum myndast þar kuldapollur vegna útgeislunar frá yfirborðinu sem og að kalt loft leitar niður í lægðir í landslagi. Kalt loft hefur meiri eðlismassa en hlýtt loft og því er kaldast næst yfirborði við þessar aðstæður. Sjá fróðleiksgreinina " Næturfrost " fyrir nánari útskýringar. Um leið og hreyfir vind blandast loftið betur og dregur hratt úr frostinu.  Kuldapollar eru þekktir á fleiri stöðum á landinu, t.d. eru þeir algengir á Þingvöllum og við Mývatn að vetri til.

Lágmarkshiti (°C) á veðurstöðinni Víðidal, 26. janúar til 4. febrúar 2019. Línan er lituð eftir mesta vindhraða (m/s). Sjá má að þrátt fyrir að vindhraði hafi sjaldan verið mikill á þessu tímabili þá dró að jafnaði úr frosti þegar hreyfði vind og frost mældist þá samsvarandi og við Arnarnesveg og í veðurreit Veðurstofunnar.

Fjölgun veðurstöðva á höfuðborgarsvæðinu liður í að bæta þjónustu Veðurstofunnar

Með fjölgun veðurstöðva á höfuðborgarsvæðinu munu veðurmælingar sýna enn betur að veðurlag á svæðinu er jafn fjölbreytt og landslagið, hæð yfir sjávarmáli og fjarlægð frá sjó. Það verður spennandi að fylgjast áfram með mælingum í Víðidal. Líklegt er að þar verði hámarkshiti að sumarlagi nokkuð hærri en í veðurreit Veðurstofunnar, þar sem hafgolan er oft ríkjandi á sumardögum.


 https://www.vedur.is/um-vi/frettir/fjolbreytileiki-hitafars-a-hofudborgarsvaedinu

Árið 2018 eitt fjögurra hlýjustu ára frá upphafi samfelldra mælinga

Meðalhiti jarðar um 1°C hlýrri en fyrir iðnbyltingu

7.2.2019

Í gær voru birtar niðurstöður frá fimm stofnunum sem meta þróun hnattræns meðalhita. Niðurstöðum ber saman um að árin 2015, 2016, 2017 og 2018 hafi verið fjögur hlýjustu árin síðan samfelldar mælingar hófust. Árið 2018 var um 1°C hlýrra en meðalhiti jarðar fyrir iðnbyltingu (með óvissu um ±0.13°C) og er fjórða hlýjasta árið.
Í fréttatilkynningu Alþjóðaveðurfræðistofnunarinnar (WMO) segir Petteri Taalas aðalritari stofnunarinnar að langtímahneigð meðalhita skipti meiru en röðun einstakra ára. Hlýnun bæði í hafi og á landi sé fordæmalaus og 20 hlýjustu árin hafi átt sér stað á síðustu 22 árum.  Hitatölur séu þó einungis hluti sögunnar, mörg þjóðríki og milljónir manna hafi orðið fyrir skakkaföllum vegna öfga í veðri og veðurfari árið 2018. "Margir þessara atburða falla vel að því sem búast má við vegna loftslagsbreytinga. Þetta er sá veruleiki sem við verðum að horfast í augu við. Samdráttur í losun gróðurhúsalofttegunda og aðlögun að áhrifum loftslagsbreytinga  ættu að vera hnattrænt forgangsmál".

https://www.vedur.is/um-vi/frettir/arid-2018-eitt-fjogurra-hlyjustu-ara-fra-upphafi-samfelldra-maelinga

Tíðarfar í janúar 2019

Stutt yfirlit

1.2.2019

Janúar var sérlega tvískiptur. Óvenju mikil hlýindi einkenndu fyrri hluta mánaðarins, hiti var langt yfir meðallagi um land allt og snjólétt víðast hvar. Seinni hluti mánaðarins var mun kaldari og þá sérstaklega síðustu dagarnir. Töluverður snjór var víða um land, vindur hægur og nokkuð bjart í veðri.

Hiti

Meðalhiti í Reykjavík í janúar var 0,5 stig og er það 1,0 stigi ofan meðallags áranna 1961 til 1990 en -0,8 stigum neðan meðallags síðustu tíu ára. Á Akureyri var meðalhitinn -0,9 stig, 1,3 stigum yfir meðallagi áranna 1961 til 1990 en -0,8 stigum undir meðallagi síðustu tíu ára. Í Stykkishólmi var meðalhitinn 0,5 stig og 0,8 stig á Höfn í Hornafirði.
Meðalhita og vik á fleiri stöðvum má sjá í töflu.

stöð	meðalhiti °C	vik 1961-1990 °C	röð	af	vik 2009-2018 °C
Reykjavík	0,5	1,0	50	149	-0,8
Stykkishólmur	0,5	1,8	37 til 39	174	-0,3
Bolungarvík	-0,2	1,0	48	122	-0,8
Grímsey	0,5	1,7	37	146	-0,8
Akureyri	-0,9	1,3	49	139	-0,8
Egilsstaðir	-0,9	1,5	24	65	-0,7
Dalatangi	1,5	1,2	33	81	-0,7
Teigarhorn	0,6	0,9	57	147	-1,0
Höfn í Hornaf.	0,8				-0,8
Stórhöfði	2,3	1,0	42	143	-0,4
Hveravellir	-5,2	1,4	22	55	-0,9
Árnes	-1,3	0,8	57	140	-1,1

Meðalhiti og vik (°C) í janúar 2019
Óvenju hlýtt var á landinu fram til þess 12. Þá tók við svalt veður, sérstaklega síðustu 6 daga mánaðarins. Meðalhiti mánaðarins var yfir meðallagi áranna 1961 til 1990 á landinu öllu en undir meðallagi síðustu tíu ára. Að tiltölu var kaldast inn til landsins á suðvestanverðu landinu. Neikvætt vik miðað við síðustu tíu ár var mest -1,9 stig á Þingvöllum en minnst á Keflavíkurflugvelli þar sem meðalhitinn var jafn meðalhita síðustu tíu ára.

Hitavik sjálfvirkra stöðva í janúar miðað við síðustu tíu ár (2009-2018).
Meðalhiti mánaðarins var hæstur 3,5 stig í Surtsey en lægstur -6,5 stig í Sandbúðum. Í byggð var meðalhitinn lægstur -4,4 stig í Möðrudal.
Hæsti hiti mánaðarins mældist 18,9 stig á Dalatanga þ. 9 og er það nýtt dægurhámarkmet. Hæsti hiti sem mælst hefur á landinu í janúar eru 19,6 stig sem mældust á Dalatanga þann 15. árið 2000. Mesta frost í mánuðinum mældist -27,5 stig í Möðrudal þ. 27.

Úrkoma

Úrkoma í Reykjavík mældist 102,9 mm sem er 35% umfram meðallag áranna 1961 til 1990. Á Akureyri mældist úrkoman 67,9 mm sem er 23% umfram meðallag áranna 1961 til 1990. Í Stykkishólmi mældist úrkoman 90,0 mm
Dagar þegar úrkoma mældist 1,0 mm eða meiri í Reykjavík voru 18, fimm fleiri en í meðalári. Á Akureyri mældist úrkoma 1,0 mm eða meiri 10 daga mánaðarins, einum færri en í meðalári.

Snjór

Alhvítir dagar í Reykjavík voru 13, einum færri en að meðaltali 1971 til 2000. Alhvítt var 22 daga á Akureyri sem er jafnt meðaltalinu 1971 til 2000.

Sólskinsstundafjöldi

Sólskinsstundir í Reykjavík mældust 37,4 sem er 10,5 stundum fleiri en í meðallagi í janúar. Á Akureyri mældust sólskinsstundirnar 7,5 sem er 1 stund fleiri en í meðalári.

Vindur

Meðalvindhraði á landsvísu var um 0,6 m/s undir meðallagi áranna 1961 til 1990. Sunnanáttir voru tíðar fyrri hluta mánaðar en norðanáttir þann seinni. Hvassast var á landinu þ. 9 (suðvestanátt).

Loftþrýstingur

Meðalloftþrýstingur í Reykjavík mældist 1007,1 hPa sem er 6,8 hPa yfir meðallagi áranna 1961 til 1990. Hæsti þrýstingur í mánuðinum mældist 1039,7 hPa á Egilsstaðaflugvelli þ. 1. Lægsti loftþrýstingur mánaðarins mældist 969,2 hPa á Eyrarbakka þ. 21.

Skjöl fyrir janúar

Meðalhiti á sjálfvirkum veðurstöðvum í janúar 2019 (textaskjal).
Daglegtyfirlit mánaðarins á fjórum ákveðnum veðurstöðvum er hægtsækja í sérstaka töflu.

 https://www.vedur.is/um-vi/frettir/tidarfar-i-januar-2019
 

Tíðarfar í desember 2018

Stutt yfirlit

2.1.2019

Óvenju hlýtt var í desember og var hiti vel yfir meðallagi í öllum landshlutum. Töluvert fannfergi var þó á Norðurlandi í byrjun mánaðar og mældist snjódýpt á Akureyri 105 cm þ. 3. sem er mesta snjódýpt sem mælst hefur þar í desembermánuði. Austlægar áttir voru ríkjandi í desember.

Hiti

Meðalhiti í Reykjavík í desember var 2,7 stig og er það 2,9 stigum yfir meðallagi áranna 1961 til 1990, en 2,4 stigum yfir meðallagi síðustu tíu ára. Á Akureyri var meðalhitinn 0,6 stig, 2,5 stigum yfir meðallagi áranna 1961 til 1990 en 1,8 stigum yfir meðallagi síðustu tíu ára. Í Stykkishólmi var meðalhitinn 1,8 stig og 3,0 stig á Höfn í Hornafirði.
Meðalhita og vik á fleiri stöðvum má sjá í töflu.

stöð	meðalhiti °C	vik 1961-1990 °C	röð	af	vik 2008-2017 °C
Reykjavík	2,7	2,9	7	148	2,4
Stykkishólmur	1,8	2,6	15	173	1,7
Bolungarvík	2,0	2,9	8	121	2,1
Grímsey	2,2	3,1	8	145	1,5
Akureyri	0,6	2,5	22	138	1,8
Egilsstaðir	1,2	3,4	5	64	2,8
Dalatangi	3,6	3,0	6	81	1,9
Teigarhorn	2,8	2,9	8	146	2,0
Höfn í Hornaf.	3,0				2,2
Stórhöfði	3,9	2,5	9	141	2,0
Hveravellir	-2,6	3,7	4	54	3,0
Árnes	1,6	3,5	6	139	3,0

Meðalhiti og vik (°C) í desember 2018
Mjög hlýtt var á landinu öllu í desember. Hitinn var vel yfir meðallagi síðustu tíu ára (sjá mynd). Að tiltölu var hlýjast inn til landsins en kaldara á annesjum norðanlands. Jákvætt hitavik miðað við síðustu tíu ár var mest 3,5 stig í Möðrudal en minnst 0,9 stig á flugvellinum á Sauðárkróki.

Hitavik sjálfvirkra stöðva í desember miðað við síðustu tíu ár.
Meðalhiti mánaðarins var hæstur 5,0 stig í Surtsey en lægstur -4,3 stig í Sandbúðum. Í byggð var meðalhitinn lægstur í Svartárkoti, -2,2 stig.
Hæsti hiti mánaðarins mældist 14,7 stig á Kvískerjum þ. 24. Mesta frost í mánuðinum mældist -22,6 stig í Möðrudal þ. 4.

Úrkoma

Úrkoma í Reykjavík mældist 82,2 mm sem er rétt yfir meðallagi áranna 1961 til 1990. Á Akureyri mældist úrkoman 66,4 mm sem er 25 % umfram meðallag áranna 1961 til 1990. Í Stykkishólmi mældist úrkoman 79,3 mm.
Dagar þegar úrkoma mældist 1,0 mm eða meiri í Reykjavík voru 16, tveimur fleiri en í meðalári. Á Akureyri mældist úrkoma 1,0 mm eða meiri 10 daga mánaðarins, einum færri en í meðalári.

Snjór

Alhvítt var 3 morgna í Reykjavík, 10 færri en að meðaltali 1971 til 2000. Á Akureyri voru alhvítu dagarnir 15, fimm færri en að meðaltali sama tímabils.
Mikið fannfergi var á Akureyri í byrjun mánaðarins og mældist snjódýpt 105 cm þ. 3 sem er mesta snjódýpt sem mælst hefur þar í desembermánuði.

Sólskinsstundafjöldi

Sólskinsstundir í Reykjavík mældust 10,4 og er það í meðallagi. Á Akureyri mældust 0,3 sólskinsstundir sem er einnig í meðallagi.

Vindur

Vindhraði á landsvísu var 0,2 m/s undir meðallagi. Austlægar áttir voru ríkjandi í desember. Hvassast var á landinu þ. 1. (norðaustanátt), þ. 6. (austanátt) og þ. 31. (norðvestanátt).

Loftþrýstingur

Meðalloftþrýstingur í Reykjavík mældist 998,5 hPa sem er 2,6 hPa undir meðallagi áranna 1961 til 1990. Hæsti þrýstingur í mánuðinum mældist 1035,2 hPa á Reykjavíkurflugvelli þ. 31. Lægsti loftþrýstingur mánaðarins mældist 965,8 hPa á Kirkjubæjarklaustri – Stjórnarsandi þ. 18.

Skjöl fyrir desember

Meðalhiti á sjálfvirkum veðurstöðvum í desember 2018 (textaskjal).
Daglegt yfirlit mánaðarins á fjórum ákveðnumveðurstöðvum er hægt sækja í sérstaka töflu.

  https://www.vedur.is/um-vi/frettir/tidarfar-i-desember-2018

Ný veðurstöð í Víðidal

Hluti af uppbyggingu veðurstöðvakerfis fyrir höfuðborgarsvæðið

18.12.2018

Ný veðurstöð Veðurstofunnar í Víðidal hefur verið tekin í gagnið. Veðurstöðin verður það sem er kallað „fjölþáttaveðurstöð“ en það þýðir að hún mælir hita, úrkomu, raka, skyggni og skýjafar. Ekki er farið að mæla allar breytur en sem stendur mælir stöðin hita, vind, rakastig og loftþrýsting. Fylgjast má með veðurathugunum frá stöðinni hér.

5 nýjar mælistöðvar á höfuðborgarsvæðinu

Nýja veðurstöðin er hluti af uppbyggingu veðurstöðvakerfis á höfuðborgarsvæðinu. Dagur B. Eggertsson borgarstjóri og Árni Snorrason forstjóri skrifuðu undir samning milli Veðurstofu Íslands og Reykjavíkurborgar um uppbyggingu veðurstöðvakerfis í borginni í apríl á þessu ári.
Stefnt er að því að setja upp 5 nýjar mælistöðvar á höfuðborgarsvæðinu og endurnýja þær fimm sem fyrir eru. Nýjar veðurstöðvar munu meðal annars rísa á Seltjarnarnesi, í Fossvogsdal og í miðbæ Reykjavíkur. Með þessum samningi eykst umfang og gæði veðurmælinga og bætir þannig þjónustu Veðurstofunnar við íbúa á höfuðborgarsvæðinu. Reiknað er með að uppbyggingu ljúki 2019.

Frá uppsetningu veðurstöðvarinnar fyrr í vetur. Veðurstöðin er staðsett við reiðvöllinn í Víðidal.

Það viðraði vel á Árna Snorrason, forstjóra Veðurstofunnar og Dag B. Eggertsson, borgarstjóra, þegar að þeir undirrituðu samninginn um upbbyggingu veðurstöðvakerfis í borginni í apríl. 

 https://www.vedur.is/um-vi/frettir/ny-vedurstod-i-vididal

Tíðarfar í nóvember 2018

Stutt yfirlit

3.12.2018

Nóvember var hlýr og hiti var yfir meðaltali á landinu öllu. Austanáttir voru ríkjandi í mánuðinum. Mikil hlýindi voru á landinu helgina 16. til 18. nóvember með sunnanátt og óvenju mikilli úrkomu á sunnan- og vestanverðu landinu. Í Reykjavík mældist úrkoman 83,2 mm á tveimur sólarhringum og er það mesta úrkoma sem mælst hefur á tveimur sólarhringum í Reykjavík. Norðaustan hvassviðri gekk yfir landið í lok mánaðar með þó nokkru fannfergi norðanlands. Snjódýpt mældist 75 cm á Akureyri þ. 30. sem er mesta snjódýpt sem mælst hefur þar í nóvembermánuði.

Hiti

Meðalhiti í Reykjavík í nóvember var 4,2 stig og er það 3,1 stigi yfir meðallagi áranna 1961 til 1990, en 1,7 stigum yfir meðallagi síðustu tíu ára. Meðalhitinn í Reykjavík var hærri (+0,3 stigum) í nóvember heldur en í október sem er heldur sjaldgjæft. Á Akureyri var meðalhitinn 1,5 stig, 1,8 stigum yfir meðallagi áranna 1961 til 1990 en 0,5 stigum yfir meðallagi síðustu tíu ára. Í Stykkishólmi var meðalhitinn 3,0 stig og 4,0 stig á Höfn í Hornafirði.
Meðalhita og vik á fleiri stöðvum má sjá í töflu.

stöð	meðalhiti °C	vik 1961-1990 °C	röð	af	vik 2008-2017 °C
Reykjavík	4,2	3,1	13	148	1,7
Stykkishólmur	3,0	2,1	23	173	1,0
Bolungarvík	2,6	1,8	21 til 22	121	1,0
Grímsey	2,9	2,3	18	145	0,7
Akureyri	1,5	1,8	28 til 29	138	0,5
Egilsstaðir	1,4	2,1	16	64	0,4
Dalatangi	3,8	2,0	19	81	0,4
Teigarhorn	3,7	2,4	15	146	0,8
Höfn í Hornaf.	4,0				1,1
Stórhöfði	4,9	2,5	12	142	1,3
Hveravellir	-1,9	2,8	9	54	1,4
Árnes	2,7	3,0	13	139	1,9

Meðalhiti og vik (°C) í nóvember 2018
Hlýtt var á landinu í nóvember og hiti var allstaðar yfir meðallagi síðustu tíu ára (sjá mynd). Að tiltölu var hlýjast á Suðvesturlandi, jákvætt hitavik miðað við síðustu tíu ár var mest 2,5 stig við Skarðsfjöruvita en minnst 0,2 stig á Torfum í Eyjafirði. 


Hitavik sjálfvirkra stöðva í nóvember miðað við síðustu tíu ár.
Meðalhiti mánaðarins var hæstur á Steinum undir Eyjafjöllum, 1,6 stig. Lægstur var hann á Brúarjökli -3,8 stig. Í byggð var meðalhitinn lægstur í Möðrudal, -1,6 stig.
Mesta frost í mánuðinum mældist -19,2 stig í Veiðivatnahrauni og í Þúfuveri þ. 2. Mest frost í byggð mældist -16,4 stig þ. 27. á Grímsstöðum á Fjöllum. Hæsti hiti mánaðarins mældist 19,2 stig á Siglufirði þ. 18 og er það nýtt landsdægurhámark þess 18. Nýtt landsdægurhámark var einnig sett á Siglufirði þ. 17. þegar hitinn mældist 18,8 stig. Óvenju mikil hlýindi voru á landinu þessa daga og féllu nóvemberhitamet á allmörgum stöðvum auk þess sem hæsti hiti ársins mældist á Siglunesi þ. 18. (17,8 stig). 

Úrkoma

Úrkoma í Reykjavík mældist 106,7 mm sem er tæplega 50 % umfram meðallag áranna 1961 til 1990. Þar af féllu 83,2 mm á tveimur sólarhringum helgina 16. til 18. nóvember. Þetta er mesta úrkoma sem mælst hefur á tveimur sólarhringum í Reykjavík. Úrkoma var víða mikil á sunnan- og vestanverðu landinu þessa daga . Á Akureyri mældist úrkoman 119,2 mm sem er meira en tvöföld meðalúrkoma áranna 1961 til 1990. Í Stykkishólmi mældist úrkoman 81,8 mm og 164,6 mm á Höfn.
Dagar þegar úrkoma mældist 1,0 mm eða meiri í Reykjavík voru 9, fjórum færri en í meðalári. Á Akureyri mældist úrkoma 1,0 mm eða meiri 13 daga mánaðarins, tveimur fleiri en í meðalári.

Snjór

Mikill snjór féll á norðanverðu landinu í lok mánaðar. Á Akureyri snjóaði mikið síðustu tvo dagana og mældist snjódýpt 75 cm þ. 30. sem er mesta snjódýpt sem mælst hefur þar í nóvembermánuði.
Alhvítt var 7 morgna á Akureyri, 8 færri en að meðaltali 1971 til 2000. Alhvítt var 1 dag í Reykjavík, 6 færri en í meðalári.

Sólskinsstundafjöldi

Sólskinsstundir í Reykjavík mældust 39,7 sem er í meðallagi. Á Akureyri mældust 19,5 sólskinsstundir, um 5 fleiri en í meðalári.

Vindur

Vindur á landsvísu var 0,2 m/s yfir meðallagi. Austlægar áttir voru ríkjandi allan mánuðinn. Norðaustan hvassviðri gekk yfir landið dagana 28. til 30. og var sá 29. langhvassasti dagur ársins í byggðum landsins. Nokkur nóvembervindhraðamet féllu þann daginn, t.d. á Fíflholti á Mýrum, Mörk á Landi, Gauksmýri, Blönduósi, Svínadal í Dölum og Þverárfjalli.

Loftþrýstingur

Meðalloftþrýstingur í Reykjavík mældist 1002,3 hPa sem er 1,8 hPa undir meðallagi áranna 1961 til 1990. Hæsti þrýstingur í mánuðinum mældist 1034,9 hPa á Teigarhorni þ. 20. Lægsti loftþrýstingur mánaðarins mældist 967,7 hPa á Kirkjubæjarklaustri-Stjórnarsandi þ. 29.

Fyrstu 11 mánuðir ársins

Meðalhiti í Reykjavík fyrstu 11 mánuði ársins var 5,4 stig, sem er 0,6 stigum ofan meðallags áranna 1961 til 1990, en -0,6 stigum neðan meðallags síðustu tíu ára. Meðalhitinn raðast í 41. sæti á lista 148 ára. Á Akureyri var meðalhitinn 4,9 stig sem er 1,2 stigum ofan meðallags áranna 1961 til 1990 en jafnt meðallagi síðustu tíu ára. Meðalhitinn þar raðast í 15. sæti á lista 138 ára.
Fyrstu 11 mánuðir ársins hafa verið úrkomusamir á landinu. Úrkoman í Reykjavík hefur mælst 972,7 mm og er það um 35% umfram meðallag áranna 1961 til 1990. Þetta er mesta úrkoma sem mælst hefur í Reykjavík fyrstu 11 mánuði ársins síðan árið 1989. Úrkoma á Akureyri hefur mælst 629,5 mm sem er um 45% umfram meðallag. Þar hefur úrkoman ekki mælst eins mikil fyrstu 11 mánuði ársins síðan árið 1991.

Haustið (október og nóvember)

Meðalhiti haustsins í Reykjavík var 4,0 stig. Það er 1,3 stigum ofan meðallags áranna 1961 til 1990, en 0,2 stigum ofan meðallags síðustu tíu ára. Á Akureyri var meðalhiti haustsins 2,4 stig, 1,1 stigi ofan meðallags áranna 1961 til 1990, en jafnt meðallagi síðustu tíu ára.
Samanlögð úrkoma október og nóvembermánaða í Reykjavík mældist 220,6 sem er 40% umfram meðalhaustúrkomu áranna 1961 til 1990. Á Akureyri mældist úrkoma haustsins 194,8 mm sem er 75% umfram meðallag áranna 1961 til 1990.

Skjöl fyrir nóvember

Meðalhiti á sjálfvirkum veðurstöðvum í nóvember 2018 (textaskjal).
Daglegt yfirlit mánaðarins á fjórum ákveðnumveðurstöðvum er hægt sækja í sérstaka töflu.
 https://www.vedur.is/um-vi/frettir/tidarfar-i-november-2018
 

Tíðarfar ársins 2018

Yfirlit

15.1.2019

Árið 2018 var úrkomusamt og nokkuð hlýtt. Úrkoma var yfir meðallagi á nær öllu landinu og úrkomudagar óvenju margir bæði sunnan- og norðanlands. Sumarmánuðirnir voru svalir á suðvestanverðu landinu á meðan hlýtt var norðaustanlands. Sólarlítið var á suðvesturhluta landins á árinu og hafa ekki mælst eins fáar sólskinsstundir í Reykjavík á einu ári síðan 1992. Júní og júlí voru óvenju þungbúnir suðvestanlands. Hlýtt var síðustu tvo mánuði ársins. Vindur var í meðallagi á árinu.

Hiti

Meðalhiti í Reykjavík var 5,1 stig og er það 0,8 stigum ofan meðallags áranna 1961 til 1990 en -0,3 stigum undir meðallagi síðustu tíu ára. Í Stykkishólmi var ársmeðalhitinn 4,5 stig, 1,0 stigi yfir meðallagi áranna 1961 til 1990. Á Akureyri var meðalhitinn 4,6 stig sem er 1,3 stigum yfir meðallagi áranna 1961 til 1990 en 0,2 stigum yfir meðallagi síðustu tíu ára. Hlýtt var á Austurlandi á árinu, á Egilsstöðum var ársmeðalhitinn 4,6 stig og 5. hlýjasta árið þar frá upphafi mælinga. Á Dalatanga var ársmeðalhitinn 5,2 stig og hefur árshitinn aðeins þrisvar sinnum verið hærri þar. Á landsvísu var hitinn 1,2 stigum ofan meðallagsins 1961 til 1990 en jafnt meðaltali síðustu tíu ára. Meðalhita og vik á fleiri stöðum má sjá í töflu.
Meðalhiti og vik ársins 2018 á nokkrum stöðum

stöð	hiti °C	vik 1961-1990	röð	af	vik 2008-2017
Reykjavík	5,1	0,8	30	148	-0,3
Hvanneyri	4,3	#	14	21	-0,3
Bláfeldur	4,8	#	14 til 15	21	-0,5
Stykkishólmur	4,5	1,0	24	173	-0,4
Bolungarvík	4,1	1,2	19 til 20	121	-0,1
Litla-Ávík	4,0	#	8	23	0,0
Blönduós	3,8	#	9	15	-0,1
Grímsey	4,1	1,8	5	145	0,2
Akureyri	4,6	1,3	14	138	0,2
Grímsstaðir	2,1	1,7	9	112	0,4
Miðfjarðarnes	4,0	#	4	19	0,6
Skjaldþingsstaðir	4,6	#	4	24	0,6
Egilsstaðir	4,6	1,7	5	64	0,6
Dalatangi	5,2	1,7	4 til 5	81	0,5
Teigarhorn	5,1	1,4	6	146	0,3
Höfn í Hornaf.	5,6	#			0,1
Fagurhólsmýri	5,7	1,1	14 til 15	106	0,1
Vatnsskarðshólar	5,9	0,9	13	40	0,0
Stórhöfði	5,4	0,6	38 til 39	142	-0,4
Árnes	4,4	0,8	28	139	-0,2
Hjarðarland	4,2	#	14	28	-0,2
Hveravellir	0,1	1,2	14	54	-0,2
Eyrarbakki	5,0	0,9	28	126	-0,2
Keflavíkurflugvöllur	4,9	0,5	29 til 31	66	-0,5

Ársmeðalhitinn var hæstur í Surtsey 6,3 stig. Lægsti ársmeðalhitinn var á Brúarjökli -1,7 stig, og lægstur í byggð í Svartárkoti, 1,7 stig.
Árið var fremur hlýtt, þá sér í lagi á Austur- og Norðausturlandi á meðan svalara var sunnan- og vestanlands. Ársmeðalhitinn var yfir meðallagi 1961 til 1990 á landinu öllu. Á mynd má sjá hitavik sjálfvirkra stöðva miðað við síðustu tíu ár. Þar sést vel hve skörp skil voru á milli landshluta þetta árið, vikin eru jákvæð norðaustanlands en neikkvæð sunnan- og vestanlands. Jákvætt hitavik miðað við síðustu tíu ár var mest 0,6 stig á Skjaldþingsstöðum. Neikvætt hitavik miðað við síðustu tíu ár var mest á Botnsheiði -0,6 stig. 

Hitavik sjálfvirkra stöðva árið 2018 miðað við síðustu tíu ár. 
Hæsti hiti ársins á landinu mældist 24,7 stig á Patreksfirði þann 29. júlí þegar snögg hitabylgja gekk yfir landið. Nokkuð óvenjulegt er að hámarkshiti ársins mælist á Vestfjörðum. Mesta frost ársins mældist -25,6 stig þann 21. janúar bæði í Svartárkoti og við Mývatn.
Hæsti hiti í Reykjavík mældist 23,5 stig þann 29.júlí en mest 20,5 stig á Akureyri þann 27.júlí. Lægsti hiti í Reykjavík mældist -9,0 stig þann 19.janúar, en á Akureyri mældist lægsti hitinn -13,6 stig þann 21.janúar. 


Í Reykjavík var hiti ofan meðallags í janúar til apríl. Hiti var undir meðallagi í Reykjavík í maí og júní, rétt yfir meðallagi í júlí og ágúst og svo aftur undir meðallagi í september og október. Nóvember og desember voru mjög hlýir í Reykjavík. Á Akureyri var hiti ofan meallags í öllum mánuðum nema í ágúst. 

Úrkoma

Árið var úrkomusamt. Úrkoma var yfir meðaltali áranna 1971 til 2000 og meðaltali síðustu tíu ára á flestum stöðum landsins. Fjöldi úrkomudaga á árinu var óvenju mikill bæði í Reykjavík og á Akureyri.

stöð	ársúr	hlut f7100 %	Hlutf 0817 %	mest d.	úrkd	Úrkd>=1	alhv	alautt
Reykjavík	1054,9	128,3	120,5	47,7	261	183	38	302
Stykkishólmur	875,3	123,4	118,3	39,6	228	155	46	312
Hólar í Dýrafirði	1243,7	99,9	109,0	80,9	251	153
Litla-Ávík	897,3	#	100,6	35,9	264	166	64	229
Hraun á Skaga	454,5	88,3	89,4	18,3	205	110	53	237
Litla-Hlíð	409,6	107,6	106,6	16,8	213	93	77	245
Sauðanesviti	927,3	107,6	101,1	48,7	227	158	50	227
Akureyri	695,9	134,2	114,9	37,1	209	131	98	218
Mýri	581,8	133,0	111,6	23,2	185	122	104	195
Grímsstaðir	473,7	134,9	113,2	20,0	197	110	100	172
Dalatangi	1975,2	131,7	112,1	71,3	275	189	53	293
Höfn í Hornafirði	1874,7	139,7	121,7	56,4	281	191	#	#
Vatnsskarðshólar	2016,4	123,9	116,5	57,1	266	210	18	293
Hjarðarland	1319,2	98,4	103,5	52,7	204	174	36	278
Írafoss	2191,0	120,8	113,1	84,2	193	182	32	260
Keflavíkurflugvöllur	1219,5	109,4	117,9	35,0	274	199	34	293

Ársúrkoma (mm) í fyrsta dálki. (2) Hlutfall miðað við 1971 til 2000 (samanburður næst við fleiri stöðvar þetta tímabil heldur en 1961 til 1990). (3) Hlutfall miðað við árin 2008 til 2017 (nýliðinn áratug). (4) Mesta sólarhringsúrkoma (mm). (5) Fjöldi úrkomudaga. (6) Fjöldi daga með úrkomu 1,0 mm eða meira. (7) Fjöldi alhvítra daga. (8) Fjöldi alauðra daga.
Úrkoma í Reykjavík mældist 1054,9 mm, 28 prósent ofan meðallags áranna 1971 til 2000 en 20 prósent ofan meðallags síðustu tíu ára. Ársúrkoma hefur aðeins 7 sinnum mælst meiri frá upphafi samfelldra mælinga 1921, síðast 2007. Á Akureyri mældist úrkoman 695,9 mm, 34 prósent ofan meðallags 1971 til 2000 en 15 prósent ofan meðallags síðustu tíu ára. Úrkoman hefur aðeins tvisvar mælst meiri á Akureyri á einu ári, 2014 og 1989. Á Dalatanga mældist úrkoman 1975,2 mm, um 32 prósent umfram meðallag áranna 1971 til 2000. 

Úrkomuvik árið 2018 miðað við síðustu tíu ár (hlutfall miðað við árin 2008 til 2017). 



Árið var úrkomusamt bæði í Reykjavík og á Akureyri. Úrkoma í Reykjavík var langt umfram meðallag í Reykjavík í febrúar, maí og júní. Aldrei hefur rignt eins mikið í Reykjavík í maímánuði frá upphafi mælinga. Mars var óvenju þurr í Reykjavík. Á Akureyri var úrkoma yfir meðallagi alla mánuði ársins nema í janúar og apríl. Úrkoman var langt umfram meðallag í maí , júlí og nóvember. 
Úrkomudagar í Reykjavík voru óvenjumargir, 261 og hafa aldrei verið fleiri. Næstflestir voru úrkomudagarnir árið 1953 og 1989, 255 talsins. Dagar þegar úrkoma mældist 1,0 mm eða meiri voru 183, 35 fleiri en að meðaltali 1961 til 1990 og hafa aðeins tvisvar verið fleiri, 1953 og 1921. Úrkomudagar voru einnig óvenjumargir á Akureyri, 209, og hafa aðeins þrisvar verið fleiri á einu ári, flestir 224 árið 2014. Dagar þegar úrkoma mældist 1,0 mm eða meiri voru 131, 28 fleiri en í meðalári.
Mesta sólarhringsúrkoma ársins á sjálfvirkri stöð mældist 134,7 mm á Neskaupsstað þann 1.desmber.
Mest mældist sólarhringsúrkoman í Reykjavík 47,7 mm, þann 18. nóvember, en helgina 16. til 18. nóvember féllu 83,2 mm á tveimur sólarhringum, sem er mesta úrkoma sem mælst hefur á tveimur sólarhringum í Reykjavík. Á Akureyri mældist sólarhrings úrkoman mest 37,1 mm þann 30.nóvember. Sú úrkoma féll sem snjór. 

Snjór

Alhvítir dagar í Reykjavík voru 38 sem er 26 færri en meðaltal áranna 1971 og 2000. Þónokkur snjór var í Reykjavík í janúar og febrúar en mars var alauður sem hefur ekki gerst síðan í mars 2005. Lítillega snjóaði í maí en haustið var svo með snjóléttasta móti og hafa alhvítir dagar einungis verið 4 frá því í maí.
Alhvítir dagar ársins á Akureyri voru 98, tíu færri en meðaltal áranna 1971 og 2000. Á Akureyri var töluverður snjór í janúar og febrúar og þar til um miðjan mars. Alhvítir dagar voru færri en að meðallagi á Akureyri síðari hluta árs en mikill snjór féll þó í lok nóvember og byrjun desember. Þann 30. nóvember mældist snjódýpt 75 cm sem er mesta snjódýpt sem mælst hefur á Akureyri nóvembermánuði og þann 3. desember mældist snjódýpt 105 cm sem er mesta snjódýpt sem mælst hefur þar í desembermánuði. Mesta snjódýpt á árinu mældist 123 cm í Lerkihlíð þ. 9. mars.


Myndin sýnir vik fjölda alhvítra daga frá meðallagi í Reykjavík og á Akureyri. Fjöldi alhvítra daga var yfir meðaltali á Akureyri í janúar og febrúar. Í Reykavík voru alhvítu dagarnir yfir meðallagi í febrúar en vel undir því í mars, enda var mánuðurinn alauður. Snjólétt var bæði í Reykjavík og á Akureyri síðustu mánuði ársins en töluvert fannfergi var þó á Akureyri um mánaðarmótin nóvember til desember.

Sólskinsstundir

Sólarlítið var á suðvesturhluta landsins á árinu. Sólskinsstundir í Reykjavík mældust 1161,3, 107 færri en í meðallári 1961 til 1990, en 246 stundum færri en að meðallagi síðustu tíu ár. Ekki hafa mælst eins fáar sólskinsstundir á einu ári síðan 1992. Júní og júlí voru sérlega þungbúnir á suðvesturhorninu og ekki hafa mælst eins fáar sólskinsstundir í Reykjavík í júnímánuði síðan 1914. Á Akureyri mældust sólskinsstundirnar 1016,7 eða 28 færri en að meðaltali 1961 til 1990 og 40 færri en að meðallagi síðustu tíu ára.

Í Reykjavík var sérlega þungbúið í maí, júní og júlí og hafa sólskinsstundir ekki mælst eins fáar í Reykjavík í júnímánuði síðan 1914. Sólríkt var í mars, ágúst og september. Á Akureyri var sólríkt í mars, júní og spetember en sólarminna var í apríl, júlí, ágúst og október. 

Loftþrýstingur

Meðalloftþrýstingur í Reykjavík var 1003,0 hPa og er það 2,9 hPa undir meðallagi áranna 1961 til 1990. 
Hæsti þrýstingur ársins mældist 1046,0 hPa á Gjögurflugvelli þann 27. október en lægstur á Rauðanúpi þann 14. janúar 944,4 hPa.

Þrýstingur vék ekki svo mjög frá meðallagi í einstökum mánuðum ársins. Þrýstingur var undir meðallagi alla mánuði ársins nema í mars og í júní. Neikvæð mánaðarvik voru mest í janúar, febrúar og maí. 

Vindhraði og vindáttir

Vindhraði á landsvísu var í meðallagi á árinu. 


Vindhraði á landsvísu var vel yfir meðallagi í febrúar og maí. Mars og apríl voru hægviðrasamir. Í öðrum mánuðum var vindhraði nærri meðallagi. 


Allar vindathuganir á sjálfvirku stöðvunum eru þáttaðar í austur- og norðurstefnur, mánaðarmeðaltöl reiknuð og borin saman við meðalvindvigra síðustu 20 ára (1998 til 2017). Austlægar og norðlægar áttir fá jákvæð gildi, vestlægar og suðlægar neikvæð. Sunnanáttir (appelsínugular súlur) voru óvenju tíðar í febrúar og maí auk þess að vera ríkjandi í júní, júlí og október. Norðlægar áttir voru tíðar í janúar, mars, ágúst, september og nóvember. Vestanáttir (bláar súlur) voru ríkjandi í maí til júlí og svo aftur í september til október, en austlægar áttir voru algengari í janúar, mars, apríl og svo aftur í lok árs. 

Lauslegt yfirlit um einstaka mánuði

Janúar
Veður var umhleypingasamt en tíð var þó nokkuð hagstæð miðað við árstíma. Hiti var víðast hvar yfir meðallagi áranna 1961 til 1990 en allsstaðar undir meðallagi síðustu tíu ára. Hálka þótti mikil og þrálát.
Febrúar
Febrúar var illviðra- og úrkomusamur. Vindhraði var vel yfir meðallagi og úrkoma mikil, einkum um landið sunnan- og vestanvert. Hiti var yfir meðallagi áranna 1961 til 1990 en aðeins undir meðallagi síðustu tíu ára á Suður- og Suðvesturlandi. Töluverðar truflanir voru á samgöngum.
Mars
Mars var mjög tvískiptur. Fyrri helmingur mánaðarins var fremur kaldur. Norðaustlægar áttir voru ríkjandi, nánast úrkomulaust var um landið sunnan- og vestanvert og sérlega sólríkt. Á meðan var töluverður snjór um landið norðan og austanvert. Seinni hluti mánaðarins var hlýrri og suðlægari áttir algengari. Mánuðurinn var hægviðrasamur og lítið um illviðri.
Apríl
Tíðarfar var nokkuð hagstætt í apríl. Hiti var vel ofan meðallags 1961 til 1990. Mánuðurinn var hægviðrasamur og lítið um hvassviðri. Austanáttir voru ríkjandi og fremur úrkomusamt austanlands.
Maí
Fremur svalt var í veðri maí um landið suðvestanvert á meðan hlýtt var á Norðaustur- og Austurlandi. Mjög hlýir dagar voru í lok mánaðar á Norðuausturlandi. Mánuðurinn var óvenju úrkomusamur, þá sérstaklega vestanlands. Ný mánaðarúrkomumet voru sett á nokkrum stöðvum í maí. Í Reykjavík mældist úrkoma alla daga mánaðarins og hefur ekki mælst eins mikil úrkoma þar frá upphafi mælinga.
Júní
Mánuðurinn var óvenju þungbúinn um landið sunnan- og vestanvert. Sólskinsstundir í Reykjavík hafa ekki mælst eins fáar í júnímánði síðan árið 1914. Úrkoma var mikil í þessum landshlutum og veður fremur svalt. Á austanverðu landinu var aftur á móti hlýtt og sólríkt. Hiti fór þar margoft yfir 20 stig. Sunnan- og suðvestanáttir voru ríkjandi.
Júlí
Mánuðurinn var hlýr og bjartur austanlands en fremur svalur og sérlega sólarlítill sunnan- og vestanlands. Úrkoma var yfir meðallagi um mest allt land og mánuðurinn var víða sá úrkomusamasti um áratugaskeið. Snögg hitabylgja gekk yfir landið þ. 29. þegar hitinn fór allvíða yfir 20 stig.
Ágúst
Ágúst var fremur svalur mánuður. Hiti var nærri meðallagi áranna 1961 til 1990 en nær allsstaðar undir meðallagi síðustu tíu ára, einna síst austanlands. Úrkoma var meiri en í meðallagi norðan- og austanlands en fremur sólríkt var á vesturhluta landsins.
September
September var fremur kaldur á landinu öllu. Hiti var vel undir meðallagi síðustu tíu ára en nærri meðallagi áranna 1961 til 1990. Norðanáttir voru tíðar um miðjan mánuðinn með bjartviðri suðvestanlands en úrkomu á Norðausturlandi.
Október
Október var fremur svalur, hiti var undir meðallagi síðustu tíu ára um land allt. Tíð var þó nokkuð hagstæð. Úrkoma var víðast hvar yfir meðallagi.
Nóvember
Nóvember var hlýr og hiti var yfir meðaltali á landinu öllu. Austanáttir voru ríkjandi í mánuðinum. Mikil hlýindi voru á landinu helgina 16. til 18. nóvember með sunnanátt og óvenju mikilli úrkomu á sunnan- og vestanverðu landinu. Í Reykjavík mældist úrkoman 83,2 mm á tveimur sólarhringum og er það mesta úrkoma sem mælst hefur á tveimur sólarhringum í Reykjavík. Norðaustan hvassviðri gekk yfir landið í lok mánaðar með þó nokkru fannfergi norðanlands. Snjódýpt mældist 75 cm á Akureyri þ. 30. sem er mesta snjódýpt sem mælst hefur þar í nóvembermánuði.
Desember
Óvenju hlýtt var í desember og var hiti vel yfir meðallagi í öllum landshlutum. Töluvert fannfergi var þó á Norðurlandi í byrjun mánaðar og mældist snjódýpt á Akureyri 105 cm þ. 3. sem er mesta snjódýpt sem mælst hefur þar í desembermánuði. Austlægar áttir voru ríkjandi í desember.

Skjöl fyrir árið

Ársmeðalhiti sjálfvirkra stöðva 2018 (textaskjal)

  https://www.vedur.is/um-vi/frettir/tidarfar-arsins-2018

Sjálfvirk veðurstöð verður sett upp á Selfossi

Aðgengi að staðbundnum veðurgögnum liður í að bæta þjónustu og rekstur sveitarfélagsins

4.10.2018

Í morgun var undirritaður samningur á milli Veðurstofu Íslands og sveitarfélagsins Árborgar um rekstur veðurstöðvar á Selfossi. Veðurstöðin, sem verður staðsett í jaðri íbúabyggðarinnar, mun mæla lofthita, vindátt og vindhraða. Einnig verða gerðar mælingar á loftraka og úrkomu. „Við erum mjög ánægð með þessi skref sem við erum að stíga í samvinnu við Veðurstofuna. Aðgengi að staðbundnum veðurgögnum er liður í því að bæta þjónustu við íbúa sem og rekstur sveitarfélagsins. Gögn frá þessari stöð hafa áhrif á gæði þeirra ákvarðana sem við tökum, er snúa að þáttum í rekstri sveitarfélagsins sem eru háðir veðri. Þá er ég kannski sérstaklega að horfa til fráveitumála“, segir Tómas Ellert Tómasson, formaður framkvæmda- og veitustjórnar sveitarfélagsins Árborgar.
Veðurstofa Íslands mun sjá um varðveislu gagna úr veðurstöðinni, reka gagnagrunn þeim tengdum og halda honum við. Gögnin úr veðurstöðinni á Selfossi verða birt á vef Veðurstofunnar og þar með aðgengileg almenningi. Stefnt er að því að veðurstöðin verði komin í gagnið á fyrri hluta næsta árs.

Óðinn Þórarinnsson, framkvæmdastjóri athugana- og tæknisviðs Veðurstofunnar, Jón Tryggvi Guðmundsson framkvæmda- og veitustjóri og Tómas Ellert Tómasson, formaður framkvæmda- og veitustjórnar Árborgar, velta fyrir sér heppilegri staðsetningu veðurstöðvarinnar. Ljósmynd: Guðrún Nína Petersen

https://www.vedur.is/um-vi/frettir/sjalfvirk-vedurstod-verdur-sett-upp-a-selfossi

Tíðarfar í maí 2019

Stutt yfirlit

3.6.2019

Maí var nokkuð hlýr og sólríkur um vestanvert landið á meðan svalara var norðan- og austanlands. Þurrt var um allt land. Norðaustlægar áttir voru ríkjandi. Loftþrýstingur var óvenju hár í mánuðinum.

Hiti

Meðalhiti í Reykjavík í maí var 7,7 stig og er það 1,4 stigum yfir meðallagi áranna 1961 til 1990, en 0,9 stigum yfir meðallagi síðustu tíu ára. Á Akureyri var meðalhitinn 5,9 stig, 0,4 stigum yfir meðallagi áranna 1961 til 1990 en -0,6 stigum undir meðallagi síðustu tíu ára. Í Stykkishólmi var meðalhitinn 6,1 stig og 5,5 stig á Höfn í Hornafirði.
Meðalhita og vik á fleiri stöðvum má sjá í töflu.

stöð	meðalhiti °C	vik 1961-1990 °C	röð	af	vik 2009-2018 °C
Reykjavík	7,7	1,4	22	149	0,9
Stykkishólmur	6,1	1,2	40	174	0,2
Bolungarvík	5,2	1,3	35	122	0,2
Grímsey	3,6	0,8	50 til 51	146	-0,6
Akureyri	5,9	0,4	64 til 65	139	-0,6
Egilsstaðir	4,5	-0,4	43 til 44	65	-1,3
Dalatangi	3,6	0,3	51 til 52	81	-0,9
Teigarhorn	4,6	0,1	74 til 77	147	-0,9
Höfn í Hornaf.	5,5				-1,1
Stórhöfði	6,1	0,2	67	142	-0,2
Hveravellir	3,0	2,4	5	55	1,2
Árnes	7,2	1,1	31	140	0,7

Meðalhiti og vik (°C) í maí 2019
Maí var hlýr að tiltölu um vestanvert landið og inná miðhálendi á meðan svalara var norðan- og austanlands. Maí var kaldari en apríl mjög víða á Norður- og Austurlandi. Á mynd má sjá hitavik sjálfvirkra stöðva miðað við síðustu tíu ár. Þar má sjá hve skörp skil voru á milli landshluta í maí. Jákvætt hitavik miðað við síðustu tíu ár var mest 2,2 stig á Setri en neikvætt hitavik var mest á Gagnheiði, -1,4 stig.

Hitavik sjálfvirkra stöðva í maí miðað við síðustu tíu ár (2009-2018).
Meðalhiti mánaðarins var hæstur 7,9 stig við Blikdalsá á Kjalarnesi og við Þyril í Hvalfirði. Lægstur var meðalhitinn -2,3 stig á Gagnheiði. Á láglendi var meðalhitinn lægstur 2,5 stig á Fonti á Langanesi.
Mest frost í mánuðinum mældist -10,2 stig á Ásgarðsfjalli í Kerlingafjöllum þ. 11. Mest frost í byggð mældist -8,8 stig í Svartárkoti þ. 10. Hæsti hiti mánaðarins mældist 20,6 stig í Ásbyrgi þ. 17.

Úrkoma

Mánuðurinn var þurr um land allt.
Úrkoma í Reykjavík mældist 34,0 mm sem er um 75% af meðalúrkomu áranna 1961 til 1990. Á Akureyri mældist úrkoman 12,1 mm sem er um 60% af meðalúrkomu áranna 1961 til 1990. Úrkoma í Stykkishólmi mældist 27,2 mm.
Dagar þegar úrkoma mældist 1,0 mm eða meiri í Reykjavík voru 9, einum færri en í meðalári. Á Akureyri mældist úrkoma 1,0 mm eða meiri 4 daga sem er einum færri en í meðalári.

Snjór

Einhvað snjóaði um landið norðan- og austanvert í mánuðinum, en jörð var þó aldrei alhvít á Akureyri. Alautt var í Reykjavík allan mánuðinn.

Sólskinsstundafjöldi

Sólríkt var suðvestanlands í maí. Sólskinsstundir í Reykjavík mældust 236,8 sem er 44,8 stundum yfir meðallagi áranna 1961 til 1990. Á Akureyri mældust sólskinsstundirnar 157,4 sem er 16 stundum færri en að meðaltali 1961 til 1990.

Vindur

Vindur á landsvísu var 0,2 m/s yfir meðallagi. Norðaustlægar áttir voru ríkjandi allan mánuðinn að nokkrum dögum undanskildum um miðbik mánaðarins þegar áttin var suðaustlæg.

Loftþrýstingur

Loftþrýstingur var óvenju hár í mánuðinum. Meðalloftþrýstingur í Reykjaví mældist 1020,2 hPa og er það 7,8 hPa yfir meðallagi áranna 1961 til 1990. Mánaðarþrýstimeðaltal hefur ekki verið eins hátt síðan í febrúar 1986 og ekki í maí síðan 1975, en þá var það jafnt meðaltalinu nú.
Hæsti loftþrýstingur mánaðarins mældist 1036,7 hPa í Grímsey þ. 3. Lægstur mældist loftþrýstingurinn 1008,6 hPa í Grindavík þ. 13 og er það óvenju hár lágmarksþrýstingur. Lágmarksþrýstingurinn hefur aldrei verið eins hár í maímánuði (ámóta þó 1838 og 1843). 

Fyrstu fimm mánuðir ársins

Meðalhiti í Reykjavík fyrstu fimm mánuði ársins var 3,4 stig sem er 1,5 stigum ofan meðallags áranna 1961 til 1990 en 0,4 stigum yfir meðallagi síðustu tíu ára. Meðalhitinn raðast í 10. sæti á lista 149 ára. Á Akureyri var meðalhiti mánaðanna fimm 2,2 stig. Það er 1,7 stigum ofan meðallags áranna 1961 til 1990 en 0,3 stigum ofan meðallags síðustu tíu ára. Meðalhitinn þar raðast í 17. sæti á lista 139 ára. Úrkoman hefur verið 15% umfram meðallag í Reykjavík, en 10% umfram meðallag á Akureyri.

Vorið (apríl og maí)

Vorið var mjög hlýtt og tíð hagstæð. Þar munaði mestu um óvenju hlýjan apríl. Gróður fór snemma af stað.
Hiti var vel yfir meðallagi áranna 1961 til 1990 og síðustu tíu ára (í sviga). Hann var +2,5 stigum yfir í Reykjavík (+1,8), +2,8 stigum yfir á Akureyri ( +1,8 ), 2,7 stigum yfir í Stykkishólmi (+1,6 ) og + 2,0 yfir á Egilsstöðum (+1,0).
Vorið var það næsthlýjasta frá upphafi mælinga í Reykjavík, Stykkishólmi og á Akureyri, vorið 1974 var hlýrra á þessum stöðum. Á Egilsstöðum var vorið það níunda hlýjasta.
Í Reykjavík var úrkoman um 15% umfram meðallag áranna 1961 til 1990. Í Stykkishólmi var úrkoman um 85% af meðalúrkomu. Þurrt var á Akureyri. Úrkoman þar var um 40% af meðalúrkomu áranna 1961 til 1990, sú minnsta síðan 1997.

Skjöl fyrir maí

Meðalhiti á sjálfvirkum veðurstöðvum í maí 2019 (textaskjal).
Daglegt yfirlit mánaðarins á þremur ákveðnum veðurstöðvum er hægt að sækja í sérstaka töflu.





https://www.vedur.is/um-vi/frettir/tidarfar-i-mai-2019